Bolognese, altyd die moeite werd.

Deur Marli Mckellar

Gepubliseer 15 Desember 2025

Bedien:

8

Porsiegrootte:

150g

Voorbereidengstyd:

20 min

Kooktyd:

3 ure

"Vinnige" Bolognese?

Daar is min dinge so vertroostend soos ’n pot bolognese wat rustig op die stoof prut. Dis nie haastige kos nie(Alhoewel ek vir een of ander rede ‘vinnig’ gesê het in die video). Dis die tipe kos wat jou kombuis laat ruik soos Sondag

.

Is hierdie die egte, Italiaanse weergawe? Probably nie. Maar dis my weergawe — en ek het nog nooit klagtes gekry nie. 😉

Bestanddele:

2e Olyfolie

1e Botter

1 Ui,fyn gekap

1 Wortel, fyngekap

1 Selderystingel, fyngekap

100g Spek, fyngekap

1e Tamatie paste

3 Knoffelhuisies, fyngemaal

500g Beesmaalvleis

250g Varkmaalvleis

125ml Droë witwyn

125ml Volroommelk

1 blik(400g) Tamaties

1 Lourierblaar

1 tee Tiemie, vars

¼ tee Neutmuskaat

Stukkie parmesaanskil (opsioneel)

Metode:

Stap 1

Verhit die olyfolie en botter in 'n swaarboompot. Voeg die ui, wortel, seldery en spek by. Braai stadig oor medium hitte vir sowat 10–15 minute tot alles sag en geurig is, maar nie bruin nie.

Stap 2

Roer die knoffel en tamatiepasta by en kook nog 2 minute.

Stap 3

Draai die hitte hoër. Voeg die vleis in sarsies by en geur met sout en peper. Braai dit mooi bruin – moenie roer tot dit begin kleur kry nie. Dis waar die geur vandaan kom!

Stap 4

Gooi die wyn in en laat dit prut totdat die meeste vloeistof weggekook het. Skraap enige bruin stukkies van die bodem af – dis smaak!

Stap 5

Gooi die melk in en laat dit prut tot dit amper heeltemal geabsorbeer is. Dit maak die sous romerig en balanseer die suur van die tamaties.

Stap 6

Voeg die tamaties, lourierblaar, tiemie en neutmuskaat by. Breek die tamaties op met 'n lepel indien nodig. Gooi die parmesaankors in as jy een het.

Stap 7

Verlaag die hitte heeltemal. Sit die deksel halfpad op en laat die sous stadig prut vir 2.5 tot 3.5 uur. Roer af en toe. Voeg water of aftreksel by as dit begin uitdroog.

Stap 8

Verwyder die lourierblaar en parmesaankors (indien gebruik). Proe en geur met ekstra sout en peper indien nodig.

Vir my gaan bolognese nie oor perfeksie nie, maar oor balans. Stadige hitte. Geduld. En ’n paar klein keuses wat ’n groot verskil maak. Soos om jou vleis kans te gee om regtig bruin te word. En om nie bang te wees vir ’n bietjie melk in ’n tamatiesous nie — dis presies wat alles bymekaar bring.

Download Resep

Die resultaat

’n Ryk, lip-lek-lekker bolognese wat perfek is oor vars pasta of selfs net met ’n lepel uit die pot (ek oordeel nie). Dis eenvoudige kos, maar met karakter. Kos wat mense stil maak aan tafel.

Maak dit vir jou mense. Of net vir jouself.

Meer resepte