Komkommer Pekel

Oom Stanley was een van daai stoute ooms op die dorp. Almal ken die tiepe. 

Hy't n bulderende lag gehad wat mens omtrent drie vertrekke weg hoor.

Oom Stanley aka Hagar

Sy rooi baard en bos hare het altyd 'n bietjie windverwaaid gelyk, ten spyte van sy beste pogings om dit in toom te hou. ‘n Regte Hagar van die Vrystaat.

Is dit reg? Was sy hare even rooi? Jou kleintyd herinnering is mos altyd meer kleurvol as die waarheid.

Ek onthou beslis dat hy baie lief was vir gesels en altyd reg was met 'n storie of 'n grappie.

As my ma gaan koek aflewer het, het dit soos ure gevoel van gesels in die tuin, terwyl ek verveeld klippe rond skop en die kwaai hoenderhane probeer duck.

Hierdie resep is Oom Stanley se Soet Suur Komkommer Pekel!

Dankie Oom.

Bestanddele:

• 1 groot komkommer (720 g)

• 1 groot wit ui (180 g)

• 4 knoffelhuisies

• 125 ml fyn sout

• 250 ml wit asyn

• 125 ml wit suiker

• 1 teelepel mosterdpoeier

• 1 teelepel borrie

• 1 teelepel droë tiemie

  
  

Metode:

1. Sny die komkommer in dun skywe. Laai die gesnyde skywe in 'n groot bak met sout tussen die verskillende lae. Sit 'n paar ysblokkies bo-op en laat staan vir ten minste 1 uur.

2. Sny die ui en knoffel in dun skywe.

3. Vir die pekelsous, voeg die wit asyn, suiker, mosterdpoeier, borrie en tiemie in 'n kastrol. Bring tot kookpunt en roer totdat die suiker heeltemal opgelos is.

4. Dreineer die yswater van die komkommer. Pak die komkommer, uie en knoffel in lae in die bottels. Druk die bestanddele mooi vas om plek te maak.

5. Gooi die warm pekelsous oor die komkommers. Seël die bottels en draai hulle 'n paar keer om om seker te maak die sous versprei goed tussen al die lae.

Stoor die bottels onderstebo en laat dit vir ten minste twee dae staan voor gebruik.

Die resep het onlangs homself 10 000 km verder bevind in die Kaaimanseilande, danksy my vriendin Nina. Blykbaar was dit 'n groot treffer!