Tannie San se Paptert

Hierdie is die laaste dis in my pap-obsessie – ek belowe!

Tannie Susan

Die eerste keer wat ek paptert geproe het, was toe ek 11 was, by tannie San se huis in Welkom. Hierdie is waarskynlik ver van haar resep, maar sy was my inspirasie Dis ná al die jare steeds ’n stapelgereg by haar braaie.

Raphaela van Embden - Wynkenner extraordinaire

Paptert is eenvoudig én heerlik – ’n perfekte side. As jy dit nog nie ken nie: imagine iets soos ’n pap-lasagne. ’n Tamatie-smoor, verryk met rooiwyn en sampioene, gelaag tussen stywe pap en bo-op, ’n dik laag kaas.

Maar... dit kan baie vinnig weird proe as dit sleg gemaak word. So – volg my resep!En dit laat my wonder... Watse wyn pas nou die beste by paptert?

Kaapzicht Skraalhans Pinotage

Volgens my wyn-fundi-extraordinaire vriendin is daar net een opsie: Kaapzicht Skraalhans Pinotage. Hy hou sy man teen die sterk geure, en is in elk geval altyd ’n wenner by ’n braai.

Bestanddele:

• 250 g sampioene

• 1 groot ui

• 1 pak spek

• 2 knoffelhuisies

• 1 blik hele tamaties

• ½ koppie beesaftreksel

• ½ koppie rooiwyn

• 1 teelepel tiemie

• Sout & peper

• 1 koppie gerasperde gouda

• (Stywe pap vir lae – maak genoeg vooraf)

Voorbereiding:

1. Sny al jou bestanddele vooraf: sampioene, ui, spek en knoffel. Sit eenkant.

2. Braai die sampioene tot mooi bruin, haal uit en hou eenkant.

3. Braai die spek tot bros, en hou eenkant.

4. In die spekvet: braai uie tot deurskynend, voeg dan die knoffel by – roer goed sodat dit nie brand nie.

5. Gooi nou die blikkie tamaties by en laat dit prut vir 10–15 minute.

6. Voeg beesaftreksel, rooiwyn, tiemie en die spek by. Laat dit stadig prut vir 30–40 minute. Geur met sout en peper.

   
   
   
   

   

   
   

Nou sit ons die tert bymekaar:

1. Begin met ’n laag stywe pap onderin jou bak.

2. Volg met gebraaide sampioene en dan ’n laag van die sous.

3. Herhaal – jy wil ten minste twee lae hê.

4. Eindig met ’n dik laag gerasperde gouda bo-op.

5. Bak vir 40 minute by 180 °C – tot alles deurwarm is en die geure lekker ingetrek het.

   
   

Gooi bietjie basiliekruid en oreganum by vir ’n Italiaanse twist!

Laat weet as jy dit probeer – of as jy dalk jou eie paptert-geheime het. Ek’s altyd in vir ’n pap-chat.